Skip to content
Мајка и нејзиното бебе старо само 18 дена се извлечени живи од урнатините на нивниот дом во Венецуела, по околу 32 часа поминати под бетон и уништен мебел.
Дајана Патињо раскажа дека нејзиниот син Хуан Давид ѝ дал сила да остане будна и смирена додека чекала помош.
„Сè додека тој беше жив, знаев дека ќе преживеам“, изјавила таа, додавајќи дека повремено го допирала носот на бебето за да провери дали дише.
Дајана била во станот на осмиот кат во крајбрежниот регион Ла Гваира кога започнал силниот земјотрес. Истрчала кон своето дете, но за неколку секунди зградата почнала да се урива.
Под урнатините останала со заробена нога и глава притисната до карпа, но успеала да го задржи бебето во рацете. Наместо постојано да вика, решила да ја штеди силата и да бара помош само кога ќе слушне гласови или движење во близина.
Нејзиниот брат конечно го слушнал повикот и ѝ ветил дека нема да го напушти местото додека не ја извлечат. По тешка спасувачка операција, прво било спасено бебето, а околу еден час подоцна и неговата мајка.
Дајана добила повреди на двете нозе, додека малиот Хуан Давид поминал со полесни повреди. Неговиот татко Герсон моментот кога повторно го зел синот во раце го опишал како чудо.
Семејството останало без дом и речиси без сите лични работи, но порачува дека ќе почне одново. Нивното куче сè уште се води како исчезнато.
Снимката од спасувањето стана симбол на надеж во Венецуела, каде што двата разорни земјотреси од 24 јуни однесоа најмалку 1.450 животи, повредија илјадници луѓе и оставија десетици илјади без информации за своите најблиски. Потрагата продолжува во Ла Гваира, најтешко погодениот регион.
