Гостиварци плаќаат и вода и лекови, епидемијата ја празни домашната каса

Епидемијата во Гостивар не ги наполни само амбулантите, туку создаде и нов секојдневен трошок за семејствата. Покрај флашираната вода, гостиварци сè почесто купуваат пробиотици, препарати против дијареја, средства против гадење и раствори за рехидратација, покажува теренската слика од локалните аптеки.

„Имате ли пробиотик?“ и „Што препорачувате против дијареја?“ деновиве се меѓу најчестите прашања што ги слушаат фармацевтите, пишува „Гостиварпрес“. Според аптекарите со кои разговарал локалниот медиум, речиси секој втор купувач бара производ поврзан со стомачните тегоби.

Граѓаните од аптеките излегуваат со по неколку производи – пробиотици, прашоци за надоместување течности и препарати за ублажување на симптомите. Дел купуваат превентивно, но фармацевтите велат дека најголем дел од побарувачката доаѓа од лица кои веќе имаат дијареја, повраќање, гадење или други цревни тегоби.

Финансискиот товар е поголем бидејќи најголем дел од овие препарати не се издаваат на рецепт и граѓаните ги плаќаат од сопствен џеб. На аптекарските сметки се додава и трошокот за флаширана вода, откако водата од градскиот водовод беше забранета за пиење и подготовка на храна.

Иако здравствените власти оценуваат дека епидемијата постепено се смирува, во последното деноноќие биле регистрирани уште 71 лице со симптоми на цревни заболувања. Министерот за здравство Сашо Клековски изјави дека бројката се приближува до вообичаената дневна инциденца, но дека крајот на епидемијата сè уште не може официјално да се прогласи.

Паралелно продолжуваат анализите на водата и истрагата за загадувањето. Обвинителството проверува како загадена површинска вода навлегла во водоводниот систем, а се прибира документација и за милионскиот проект за водоснабдување на Гостивар.

Додека институциите ги утврдуваат причините и одговорноста, епидемијата веќе остави двојна сметка кај граѓаните – една во аптеките и друга во продавниците за вода.