Кој е мистериозниот „згоден дечко од говорницата“ што стана интернет сензација по оставката на Стармер?

Додека јавноста ја анализираше оставката на британскиот премиер, социјалните мрежи повторно се фокусираа на еден неочекуван лик. „Hot Podium Guy“, човекот кој ја поставува говорницата пред Даунинг стрит 10, повторно стана вирална ѕвезда. 

Оставката на британскиот премиер Кир Стармер предизвика бројни политички анализи и реакции, но на социјалните мрежи вниманието повторно го привлече сосема друга личност – мистериозниот „Hot Podium Guy“ или „згодниот дечко од говорницата“. 

Станува збор за човекот кој традиционално се појавува пред резиденцијата на британскиот премиер на 10 Downing Street непосредно пред важни политички соопштенија. Неговата задача е да ја постави говорницата и техничката опрема за обраќањата на премиерите, но токму неговите кратки појавувања со години привлекуваат огромно внимание на интернет. 

По најавата за оставката на Стармер, социјалните мрежи повторно се преплавија со коментари за „мистериозниот техничар“, а многумина се прашуваа кој е човекот што речиси секогаш се појавува во клучни политички моменти. Според медиумските извештаи, неговото име е Tobias Gough и работи како тонски техничар задолжен за поставување на аудио-опремата пред премиерските обраќања. 

Неговата популарност започнала уште за време на честите политички превирања во Велика Британија, кога премиери еден по друг поднесуваа оставки. Секојпат кога ќе се појавела говорницата пред Даунинг стрит, корисниците на социјалните мрежи веднаш почнувале да го бараат токму него во телевизиските преноси. Со текот на времето, тој добил статус на интернет феномен и неформален „предвесник“ на големите политички промени во земјата. 

Многумина шеговито коментираат дека неговите појавувања се речиси подеднакво очекувани како и самите политички говори. На платформите како X, TikTok и Instagram редовно се објавуваат фотографии, мемиња и видеа посветени токму на него, а прекарот „Hot Podium Guy“ стана препознатлив и надвор од Велика Британија. 

Иако неговата работа е техничка и вообичаено останува зад сцената, Тобијас Гоф ненамерно стана една од најнеобичните интернет ѕвезди поврзани со британската политика. Додека премиери доаѓаат и си заминуваат, многумина на шега велат дека токму тој е единствената константа пред вратата на Даунинг стрит.