Skip to content
Јеменските Хути соопштија дека со ракети и беспилотни летала нападнале два саудиски танкери за нафта во Црвеното Море, во првата поголема операција откако прогласија поморска блокада на Саудиска Арабија.
Според нивниот воен портпарол Јахја Сари, цели на нападот биле танкерите „Енцелија“ и „Лејла“, за кои групата тврди дека ја прекршиле блокадата. Хутите наведоа дека користеле балистички и крстосувачки ракети, како и дронови.
Саудиските власти го потврдија нападот врз „Енцелија“. Проектил го погодил танкерот и предизвикал пожар на предниот дел од бродот, но сите членови на екипажот се безбедни. Бродот бил обезбеден, а преземени се мерки за спречување загадување на морето.
Британската агенција за поморски операции УКМТО претходно соопшти дека танкер бил погоден со непознат проектил на околу 130 километри југозападно од саудискиот град Ал Шукаик. Пријавени биле пожар на бродот, но не и повредени или истекување гориво.
Нападот врз вториот танкер „Лејла“ засега не е независно потврден. Хутите тврдат и дека принудиле околу десет бродови да го сменат правецот, но „Ројтерс“ не можел да ја потврди оваа информација. Податоците за следење на пловидбата покажале дека најмалку пет танкери ја промениле маршрутата по предупредувањата да не се приближуваат до саудиските пристаништа.
Хутите ја прогласија блокадата на Саудиска Арабија на влезот во Црвеното Море и се заканија дека ќе ги напаѓаат бродовите поврзани со кралството. Вашингтон и Исламабад ги осудија заканите како опасност за слободната пловидба, регионалната безбедност и глобалната трговија.
Ескалацијата доаѓа во период кога сообраќајот низ Ормускиот Теснец е сериозно намален поради војната меѓу САД и Иран. Саудиска Арабија го користи Црвеното Море како алтернативна рута за извоз на нафта, поради што нападите кај Баб ел Мандеб дополнително го зголемија ризикот за глобалното снабдување.
Цената на нафтата „брент“ порасна на околу 96,5 долари за барел, највисоко ниво од почетокот на јуни. Пазарите реагираа на можноста истовремено да бидат нарушени пловидбата низ Ормускиот Теснец и Баб ел Мандеб, две од најважните точки за транспорт на енергенси.
