Каде е најчистото море во Црна Гора? Седум плажи што се издвојуваат по кристално чистата вода

Кога станува збор за летување во Црна Гора, чистотата на морето е еден од најважните критериуми за туристите. Најдобра потврда за квалитетот на водата, безбедноста и уреденоста на плажите е меѓународното признание „Сино знаме“, кое се доделува само на плажи што исполнуваат строги еколошки и безбедносни стандарди. За да го добијат овој сертификат, плажите мора редовно да го контролираат квалитетот на морската вода, да имаат уредена инфраструктура, спасувачка служба, добро управување со отпадот и пристапност за посетителите. 

Меѓу плажите што со години го задржуваат ова признание се Плави Хоризонти во Тиват, Мајами Бич, МЦМ Бич и Копакабана во Улцињ, Калардово во Тиват, Свети Тома во Бечиќи и Лучице кај Петровац. Секоја од нив е препознатлива по чистото море, уреденоста и условите што ги нуди за безбеден престој. 

Плажата Плави Хоризонти на полуостровот Луштица е особено популарна меѓу семејствата со деца поради ситниот песок, плиткото море и топлата вода. Во Улцињ, пак, Мајами Бич, МЦМ Бич и Копакабана се дел од познатата Голема плажа и со години ги исполнуваат строгите критериуми за квалитет на водата и безбедност. МЦМ Бич дури доби и признание како една од најдобрите плажи во Црна Гора. 

На Будванската ривиера се издвојува плажата Свети Тома во Бечиќи, која е позната по чистото море, современите содржини и високите стандарди за одржување. Во близина на Петровац се наоѓа и Лучице, живописна песочна плажа опкружена со борова шума и тиркизно море, која редовно се вбројува меѓу најубавите природни заливи на црногорското крајбрежје. 

Според програмата „Сино знаме“, Црна Гора за сезоната 2026 има вкупно 36 плажи со ова престижно меѓународно признание. Најголем број се наоѓаат во Будва, потоа во Улцињ, Бар, Тиват и Херцег Нови. Ова признание не е само симбол на чиста вода, туку и гаранција дека плажите ги исполнуваат највисоките стандарди за животна средина, безбедност и квалитет на услугите. 

За туристите кои бараат сигурен избор за летен одмор, плажите со „Сино знаме“ остануваат најдобар показател дека морето е редовно контролирано и дека условите за капење и престој се на високо ниво.