Skip to content
Охрид од 25 до 27 јуни ќе живее во ритамот на музиката, македонското вино и летната забава со петтото издание на Ohrid Wine Festival, кој повторно ќе се одржи на Кеј Македонија.
Фестивалот носи три вечери исполнети со концерти, дегустации, гастрономска понуда и дружење покрај Охридското Езеро, а годинава во центарот на вниманието ќе бидат домашните вина и македонската музичка сцена.
Посетителите ќе имаат можност да дегустираат вина од македонски винарии и производители, да откријат нови етикети и одблизу да се запознаат со вкусовите и традицијата на домашното винопроизводство.
Првата фестивалска вечер, на 25 јуни, ќе ја отворат Група Сарај, Дани Димитровска и Меморија, со програма што треба да го означи почетокот на големиот летен музички викенд во Охрид.
На 26 јуни пред публиката ќе настапат Брос и Марама, Ѓоко Ѓорчев и Кате Танева, Куку Леле и Пауза за ракија.
Завршната вечер, на 27 јуни, е резервирана за Солзи и Смеа, DJ Fic, Битолскиот камерен оркестар и Суперхикс, кои ќе го затворат фестивалот со спој на хумор, класична музика, диџеј-сет и енергичен концертен настап.
Фестивалот не е замислен само како музички настан, туку како целосно летно доживување во кое ќе се спојат виното, храната, прошетката покрај езерото и вечерната атмосфера на охридскиот кеј.
Ohrid Wine Festival во изминатите години прерасна во препознатлив дел од летната туристичка понуда на градот, привлекувајќи посетители од Македонија и од регионот.
Со домашни вина, познати музички имиња и три фестивалски вечери под отворено небо, Охрид уште на почетокот на сезоната ќе понуди нова причина за патување, дружење и наздравување покрај езерото.
