Skip to content
Пожарот на Парос и натаму беснее во областа Кампи, каде што огнот избувнал во вторникот, 28 јули, околу 13:30 часот, во близина на островската депонија. Пламените зафатиле отпад и ниска вегетација, а силниот ветер и сувите необработени површини помогнале пожарот брзо да се прошири и да се подели на два фронта.
Грчката цивилна заштита испратила две последователни предупредувања преку бројот 112. Жителите и туристите од областите Агиос Хараламбос, Кампи, Бугадос, Анерацја и Камари добиле наредба превентивно да се повлечат кон Алики и да ги следат упатствата на надлежните служби.
До последното ажурирање околу 18:50 часот, пожарот сè уште се водел како активен и немало официјално соопштение дека е локализиран. Грчките медиуми објавија дека во операцијата биле мобилизирани 14 воздушни средства, додека пожарникарските екипи добивале засилувања од Наксос, Сирос, Пиреја, Мегара и Атина.
На островот била испратена и екипа од специјалната шумска единица ЕМОДЕ, а гаснењето го координира заменик-началникот на грчката Противпожарна служба. Во акцијата учествуваат и доброволци, општински цистерни и градежна механизација.
Воздушните екипи изведувале ниски прелети и фрлале вода со цел да го забават огнот пред зајдисонце, кога леталата мора да ги прекинат операциите. Дополнителна загриженост предизвикувале прогнозите за засилување на ветерот во вечерните часови.
Во погодената област има расфрлани куќи. Според последните информации на грчката државна телевизија, пламените до тој момент не навлегле во дворовите и внатрешноста на домовите, но пожарникарите се обидувале да спречат фронтот да се приближи до населените точки.
Причината за пожарот сè уште не е утврдена. Истрагата ја презело надлежното одделение за справување со подметнати пожари на Кикладите, кое ги испитува околностите под кои огнот избувнал во просторот со отпад и сува вегетација
