Skip to content
Првите маркети на германскиот трговски синџир „Лидл“ во Македонија би можеле да бидат отворени околу Нова година, односно на преминот меѓу 2026 и 2027 година, најави вицепремиерот и министер за транспорт Александар Николоски.
Тој очекува компанијата до крајот на годинава да ја заврши подготовката на дел од продажните објекти и да започне со работа на македонскиот пазар. Сепак, станува збор за процена на владин функционер, додека од „Лидл Македонија“ засега не е соопштен официјален датум за отворање на првите продавници.
Николоски ја даде изјавата при поставувањето камен-темелник за нов маркет на „Лидл“ во Струмица. Според него, вкупните инвестиции на компанијата во земјата се проценуваат на околу 200 милиони евра и треба да донесат нови работни места, поголема конкуренција во малопродажбата и можности за домашните производители.
Посебен акцент се става на земјоделците и преработувачите од Струмичкиот Регион, кои преку системот на „Лидл“ би можеле да добијат пристап не само до домашните маркети, туку и до продажната мрежа на компанијата во други европски држави.
„Лидл“ веќе гради продажни објекти на повеќе локации во земјата. Во февруари почна изградбата на маркет во Гевгелија, со вкупна површина од 2.356 квадратни метри, од кои 1.507 квадратни метри ќе бидат продажен простор. Предвидени се и 130 паркинг места.
Во март започна и изградбата на маркет во скопската општина Гази Баба. Објектот треба да се простира на околу 2.500 квадратни метри, со приближно 1.500 квадратни метри продажен простор и 130 паркинг места.
Претходно почна изградбата на продажен објект и во скопски Аеродром, а компанијата подготвува поширока мрежа на маркети во повеќе македонски градови.
Клучен за почетокот на работата е регионалниот логистички и дистрибутивен центар во Речица кај Куманово. Инвестицијата е вредна 115 милиони евра, се простира на парцела од 170.000 квадратни метри и треба да отвори околу 230 работни места. Компанијата претходно најави дека центарот треба да започне со работа во текот на 2026 година.
Од овој центар ќе се снабдуваат продавниците на „Лидл“ во земјата, поради што неговото ставање во функција е еден од главните предуслови за отворање на маркетите.
Со влезот на „Лидл“, македонскиот малопродажен пазар ќе добие нов голем конкурент. Сепак, точниот број на маркети што ќе бидат отворени во првата фаза, нивните локации и официјалниот датум на почеток на продажбата допрва треба да бидат потврдени од компанијата.
