Skip to content
Тошковски најави кривични, но призна дека полиција не може да има на секој агол. По новиот случај на врсничко насилство во Скопје, кој ја вознемири јавноста откако снимка од нападот се прошири на социјалните мрежи, министерот за внатрешни работи Панче Тошковски најави кривични пријави за дел од децата, но и за нивните родители.
Според Тошковски, МВР ги презело сите дејствија во своја надлежност. Разговарано било со девојчето жртва, со нејзиниот родител, со децата што учествувале во настанот, со сведоците, како и со лицата што снимале. За случајот бил известен јавен обвинител, а здравствената состојба на жртвата била констатирана од лекар.
Министерот порача дека во координација со обвинителството ќе следуваат пријави за насилство, а таму каде што ќе има основ, и за малтретирање и запуштање малолетно лице. Со тоа, одговорноста не се насочува само кон децата што учествувале во насилството, туку и кон родителите, ако се утврди дека пропуштиле да постапат како што треба.
Но изјавата на Тошковски го отвори и поголемиот проблем. На прашањето за враќање на позорникарите, тој рече дека МВР со 11.650 вработени не може да обезбеди присуство на секое место каде што има граѓани. Со други зборови, државата најавува санкции, но истовремено признава дека превенцијата има сериозни ограничувања.
Токму тука е суштината на случајот. Кривичните пријави се потребни, но тие доаѓаат откако насилството веќе се случило, откако девојчето било нападнато, откако некој снимал и откако видеото ја вознемирило јавноста. Врсничкото насилство не почнува во полициска станица, туку многу порано — во училиште, во маало, во телефоните, во молкот на тие што гледаат и не реагираат.
Случајот повторно покажа дека проблемот не е само во децата што удираат, туку и во тие што снимаат, споделуваат и молчат. Насилството денес не завршува со ударот, туку продолжува како јавно понижување на интернет.
