Десет лица се приведени во Албанија поради шверц на кокаин од Латинска Америка

Албанската полиција приведе десет членови на криминална група која се занимавала со шверц на кокаин од Латинска Америка преку Италија до Албанија и оттаму во неколку европски земји, објави „Албаниан дејли њуз“.

За време на операцијата била откриена и софистицирана лабораторија за преработка на дрога.

Се претпоставува дека кокаинот, кој се увезувал преку различни европски пристаништа, се обработувал и се доставувал до други организирани криминални групи низ Европа.

Во лабораторијата полицијата запленила повеќе од 6 килограми кокаин, речиси 50 тони суровини, близу 90 килограми суви материи за мешање со дрога и 50 килограми течности за подготовка на кокаин за продажба. Пронајдена е и лабораториска опрема и пари во различни валути во вредност од над 50.000 евра.

Акцијата била спроведена во текот на викендот на барање на албанското Специјално обвинителство за борба против организираниот криминал (СПАК) и Обвинителството и финансиската полиција во италијанскиот град Реџо Калабрија со поддршка на Агенцијата на ЕУ за соработка во кривичната правда, Европравда.