Skip to content
Посветеноста на Европа кон Западен Балкан, Украина, Молдавија и другите земји кандидати „секогаш ќе бидат посилни“ од руските напори да „спречат да имаат европска иднина“, изјави денеска претседателот на Европската комисија фон дер Лајен на пленарот на Европскиот парламент, претставувајќи го новиот Колеџот на комесари и неговата програма.
Меѓу комесарите, Фон дер Лајен го претстави новиот еврокомесар за проширување, велејќи дека „Марта Кос – со своето огромно искуство – е вистинската личност за оваа работа“. Таа додаде дека „визијата за континент обединет со демократија, владеење на правото и почитување на основните слободи секогаш ќе ја води нашата работа“.
„Сонот за Европа се протега на Западен Балкан, во Украина, во Молдавија и пошироко. Ја видовме храброста на народот на Украина во продолжувањето на нивниот европски пат. Ја видовме издржливоста на народот на Молдавија да се држи до својата европска иднина /…/ Во исто време, видовме како Русија нема да застане пред ништо за да ги спречи да имаат европска иднина“, рече претседателот на Европската комисија.
Таа го претстави и првиот европски комесар за одбрана Андриус Кубилиус, велејќи дека „војната беснее на границите на Европа. И ние мора да бидеме подготвени за она што ни претстои – да работиме рака под рака со НАТО“.
„Само една споредба, Русија троши до 9% од својот БДП за одбрана. Европа троши во просек 1,9%. Нешто не е во ред во оваа равенка. Нашите трошоци за одбрана мора да се зголемат“, заклучи Фон дер Лајен.
