Русија ќе го постави прашањето за убиството на генерал-полковник Кирилов пред Советот за безбедност на ООН

 Постојаната мисија на Русија при Обединетите нации соопшти дека ќе го покрене прашањето за „терористичкиот напад врз генерал-полковник Игор Кирилов, шеф на руските одбранбени сили за радијациска, хемиска и биолошка заштита, на седницата на Советот за безбедност закажана за 20 декември.

„Ќе го покренеме прашањето за убиството на Кирилов во контекст на испораката на западно оружје на Украина“, изјави заменик-постојаниот претставник на Русија при ООН, Дмитриј Полјански.

Кирилов и неговиот помошник Иља Поликарпов загинаа денеска во експлозија во Москва.

Експлозијата била предизвикана од направа инсталирана во електричен скутер, потврди Светлана Петренко, портпаролка на Рускиот истражен комитет.

„Експлозивна направа поставена во скутер експлодираше во близина на влезот на станбена зграда на авенијата Рјазанскаја во Москва“, прецизираше Петренко.

Претходно денеска, заменик претседателот на рускиот Совет за безбедност Дмитриј Медведев ја обвини Украина за нападот, најавувајќи „неизбежна одмазда“.

.Игор Кирилов беше шеф на руските одбранбени сили за радијациска, хемиска и биолошка заштита од 2017 година. Кирилов (54) е роден на 13 јули 1970 година во Кострома, западна Русија. Студирал на Вишата воена командна школа за хемиска одбрана Кострома, каде што дипломирал во 2007 година.

За време на неговиот престој таму, помеѓу 1991 и 1995 година, служел како командант на вод во Западната група на сили во Германија и Московскиот воен округ. По дипломирањето, тој зазеде различни позиции во руските нуклеарни, биолошки и хемиски одбранбени сили, за на крајот да стане началник во 2017 година.

За време на неговата воена кариера, тој беше познат по тоа што помогна во развојот на тешкиот пламенофрлачки систем TOS-2 Тосочка. Тој беше обвинет за употреба на забрането хемиско оружје за време на војната во Украина, како и отровно средство за задушување – хлоропикрин.