Skip to content
Во ноември 2024 година, Народната банка забележа зголемување и на штедењето и на кредитирањето. Вкупните депозити се зголемени за 11% на годишно ниво, додека кредитите пораснале за 9,7%.
Месечниот пораст на вкупните депозити изнесува 0,9%, поттикнат од зголеменото штедење на домаќинствата, иако депозитите на корпоративниот сектор бележат намалување. Годишниот раст од 11% се должи на повисоките депозити во двата сектора, со посилен придонес од домаќинствата.
Долгорочните депозити до две години и депозитните пари имаат најголем раст, додека краткорочните депозити бележат пад.
Кредитите се зголемени за 0,7% на месечно и за 9,7% на годишно ниво. Растот е резултат на зголеменото кредитирање во двата сектора, при што кредитите на корпоративниот сектор имаат поголем придонес.
Кај домаќинствата, потрошувачките и станбените кредити се најзастапени. Во ноември, потрошувачките кредити пораснале за 0,7% месечно и 7,3% годишно, додека станбените кредити забележале раст од 1,2% на месечно и 11,6% на годишно ниво.
Автомобилските кредити покажуваат месечен пад од 0,7%, но годишен раст од 10,8%. Кредитите одобрени на кредитни картички бележат пад од 1% на месечно и 9,2% на годишно ниво.
Народната банка потенцира дека растот на кредитирањето и штедењето се значајни индикатори за економската активност и довербата на граѓаните во финансиските институции.
