Во билтенот на МВР нема регистрирано сообраќајка со мечка, паѓа ли во вода тврдењето на заменик директорот на „Македонија пат“

Од здружението за заштита на животните „Анима мунди“ реагираат на објавената фотографија на заменик-директорот на „Македонијапат“, Сашо Дранго, каде што позира со застрелана мечка, строго заштитен вид во Македонија. Според нив, отворањето на случај од страна на битолското Обвинителство е позитивен чекор, но инсистираат на итна и транспарентна разрешница.

Од „Анима мунди“ посочуваат дека: Во полицискиот билтен за декември нема евиденција за сообраќајна несреќа со мечка. Законските процедури за вакви случаи строго ја вклучуваат МВР.
Мечката е фотографирана во шума, што отвора сомнеж дека е неодамна застрелана.

„Толку големо животно не може да се преместува за фотографирање, освен ако е свежо убиено. Бараме брза и ефикасна истрага, како и најстрога казна за одговорните,“ велат од здружението.

„Анима мунди“ бара проверка дали во декември е пријавено убиство на мечка во надлежните институции и дали некој се обидел да го прикрие случајот. Дополнително, се бара од министерот за внатрешни работи јасен одговор:

-Дали Сашо Дранго има активна забрана за поседување оружје?
-Дали снајперот на фотографиите е законски поседуван?

„Дранго преку своите постапки ја инволвира и институцијата каде што е функционер. Не смееме да дозволиме ваквите случаи да останат несанкционирани,“ заклучуваат од „Анима мунди“.