Skip to content
Стара шолја од баба, часовник од татко, подарок од сакана личност или фотографија што нè враќа во некое убаво време. Речиси секој има предмет што нема голема материјална вредност, но за него вреди повеќе од сè. И најчесто токму таквите предмети ги чуваме внимателно, далеку од секојдневна употреба.
Но, ново научно истражување сугерира дека можеби правиме токму спротивно од она што би ни помогнало да ги зачуваме спомените.
Истражувачи од Универзитетот во Орегон и Универзитетот во Мисури – Сент Луис, преку пет студии, испитувале како користењето на предмети со сентиментално значење влијае врз нивната емоционална вредност.
Резултатите покажале дека користењето на таквите предмети може дополнително да ја зајакне приврзаноста кон нив.
Причината не е во самиот предмет, туку во спомените што ги буди. Кога користиме нешто што нè потсетува на драга личност или важен животен момент, повторно ја оживуваме емоционалната врска со минатото.
На тој начин предметот не останува само сведоштво за нешто што некогаш се случило, туку продолжува да биде дел од нашиот живот.
Истражувањето, објавено во научното списание Journal of Consumer Psychology, нуди поинаква перспектива за начинот на кој се однесуваме кон предметите што ни значат.
Наместо да ги чуваме во кутии, плакари и фиоки, нивното внимателно користење може да ни помогне да создадеме нови искуства поврзани со старите спомени.
Секако, тоа не значи дека треба секој вреден или кревок семеен предмет да го изложиме на оштетување. Но, за оние што можат безбедно да се користат, истражувањето укажува дека емоционалната вредност не мора да се зачувува со нивно оддалечување од секојдневието.
Понекогаш спомените најдобро се чуваат токму кога продолжуваме да живееме со нив.
