Skip to content
Демократите остварија историски победи на среднорочните избори во САД на 3 ноември, освојувајќи мнозинство во Претставничкиот дом и во Сенатот, според проекциите што ги објавија Асошиејтед прес и Ројтерс. Покрај пресвртите во републиканските упоришта, гласачите избраа кандидати што за првпат ќе претставуваат одредени заедници на највисоките државни функции.
Еден од најзначајните пресврти се случи во Тексас. Џејмс Таларико, кого Рацин го издвои меѓу кандидатите што би можеле да испишат историја, го победи републиканецот Кен Пакстон. Со тоа стана првиот демократ што победил на сенаторски избори во оваа држава од 1988 година. Во истата изборна ноќ, демократката Џина Инохоса го победи гувернерот Грег Абот и стана првата жена со латиноамериканско потекло избрана за гувернерка на Тексас. Демократите ја освоија функцијата по повеќе од три децении.
Уште подолга изборна суша заврши во Канзас. Демократот Адам Хамилтон го победи републиканскиот сенатор Роџер Маршал, носејќи ѝ на партијата прва сенаторска победа во државата од 1932 година. Во Јужна Каролина, Ени Ендрјус освои сенаторско место за демократите за првпат од 1998 година. Овие резултати покажуваат колку далеку во традиционално републикански територии се прошири демократскиот успех во овој изборен циклус.
Џорџија испиша поинаква страница во американската историја. Поранешната градоначалничка на Атланта, Киша Ленс Ботомс, стана првата Афроамериканка избрана за гувернерка на која било сојузна држава. Во Ново Мексико, демократката Деб Халанд стана првата жена од домородните народи на Америка избрана за гувернерка. Халанд претходно беше и првата припадничка на домородните народи што раководеше со федерално министерство.
Во Мичиген, Абдул Ел-Сајед го победи републиканецот Мајк Роџерс и стана првиот муслиман избран во американскиот Сенат. Неговата победа следува по кампања обележана со остри напади од Доналд Трамп и потпретседателот Џеј Ди Венс. Ел-Сајед, лекар и поранешен функционер во јавното здравство, беше меѓу кандидатите чиј можен историски успех Рацин го најави пред гласањето.
Минесота ја избра демократката Пеги Фланаган за прва сенаторка од домородните народи на Америка. Во Њу Хемпшир, Крис Папас го победи поранешниот републикански сенатор Џон Сунуну и стана првиот маж што отворено се изјаснува како хомосексуалец избран во Сенатот. И двете победи задржаа дотогашни демократски места, истовремено проширувајќи ја застапеноста во институцијата.
Историски резултат има и во Илиноис. Со победата на Џулијана Стратон, која ќе ѝ се придружи на сенаторката Тами Дакворт, државата ќе стане првата во САД претставувана истовремено од две сенаторки од расни малцинства.
Републиканците, исто така, забележаа историска победа. Бајрон Доналдс стана првиот Афроамериканец избран за гувернер на Флорида и првиот афроамерикански републиканец избран за гувернер во американската историја. Неговиот успех ја задржа функцијата во републикански раце и покрај силните демократски резултати во други делови од земјата.
Политичката тежина на изборите произлегува од спојот на овие различни победи. Таларико и Хамилтон освоија места што со децении им припаѓаа на републиканците. Ел-Сајед, Фланаган и Папас ги задржаа демократските позиции, но ја променија застапеноста во Сенатот. Заедно, освоените и одбранетите места го создадоа новото демократско мнозинство.
Ројтерс ги издвојува високите животни трошоци, незадоволството од економската состојба и војната со Иран како важни фактори во поразот на републиканците. Демократите добија можност тоа незадоволство да го претворат во институционален притисок врз администрацијата на Трамп, преку парламентарни истраги, буџетски преговори и гласање за законите.
Новото мнозинство ќе ја преземе работата во јануари 2027 година. Демократскиот Сенат ќе може да ги блокира претседателските номинации, вклучително и евентуалните кандидати за Врховниот суд. Трамп ќе го задржи правото на вето, што ја отвора следната фаза на поделена власт и преговори меѓу Белата куќа и Конгресот.
Дел од можните историски исходи сè уште не се решени. На Алјаска, трката меѓу демократката Мери Пелтола и републиканскиот сенатор Ден Саливан останува без прогласен победник според извештајот на Асошиејтед прес од 4 ноември. Во Претставничкиот дом, демократската победа му го отвора патот на Хаким Џефрис да стане првиот афроамерикански претседател на домот, но за таа функција допрва треба да гласа новиот состав.
