Трамп на првиот ден: Повлекување од СЗО, масовни помилувања, ограничувања за трансродови лица и мерки против имиграцијата

На првиот ден од новиот мандат, Доналд Трамп, како 47-ми претседател на САД, потпиша серија извршни одредби кои отвораат ново поглавје за американската политика. Од повлекување од Светската здравствена организација (СЗО) до масовни помилувања и остри мерки против имиграцијата, администрацијата го поставува тонот за следните четири години.

Со потпишаната одредба, САД се повлекуваат од Светската здравствена организација. Според Трамп, СЗО погрешно управувала со пандемијата COVID-19 и други здравствени кризи, што доведе до изолација на Вашингтон од меѓународните напори за справување со пандемии.

Трамп помилува 1.500 лица обвинети за учество во упадот во Конгресот на 6 јануари 2021 година, меѓу кои и членови на десничарските групи „Горди момци“ и „Чувари на заветот“. Нареди и затворање на сите нерешени случаи поврзани со настанот.

Трамп прогласи вонредна состојба на границата со Мексико, таргетирајќи ги криминалните картели како терористички организации и барајќи ревизија на безбедносните протоколи за патници од одредени земји.

Со новите мерки, федералните институции ќе признаваат само два пола – машки и женски – дефинирани според биолошките критериуми при раѓање.

Трамп потпиша мерки за замрзнување на вработувањата во федералните агенции и укинување на можноста за работа од далечина. Дополнително, побара намалување на регулативите за ублажување на инфлацијата и повлекување од Парискиот климатски договор.

Трамп формираше група под водство на Илон Маск, чија цел е значително намалување на трошоците во федералните агенции, вклучувајќи и затворање на некои од нив.

Со ова Трамп испрати јасна порака за радикална промена во насоките на федералната политика, што веднаш предизвика реакции и дебати.