Германија претрпе загуби од 735 милијарди евра поради кризите во последните пет години

Германската економија веќе три години останува под нивото од 2019 година, покажува студијата на Институтот за германска економија во Келн (IW), цитирана од Ројтерс. Пандемијата на ковид-19, војната во Украина и други геополитички превирања ја чинеле Германија 735 милијарди евра во изминатите пет години.

Според извештајот, економските загуби ги надминале сите претходни кризи во последните 25 години. Во периодот 2001-2004, тие изнесувале 3,4% од БДП, додека по финансиската криза од 2008-2009 година биле 4,1%. Денес, загубите достигнуваат 4,3% од БДП, што ја прави оваа криза најтешка за Германија од нејзиното повторно обединување.

Вкупните загуби во приватната потрошувачка се проценуваат на 470 милијарди евра, што е околу 5.600 евра по жител.

„Коронавирусот и војната во Украина речиси целосно ја парализираа инвестициската активност на компаниите. Ова ќе го намали производствениот потенцијал на Германија уште многу години“, предупредува Мајкл Греминг, економист во IW.