Во тешка состојба 14 пациенти во бугарските болници, петмина се на интубација

Состојбата на 14-те пациенти хоспитализирани во болници во Бугарија останува критична, а петмина од нив се интубирани, соопшти бугарското Министерство за здравство. Повредените се со изгореници и оштетувања од вдишување жешки гасови.

Во болницата „Пирогов“ во Софија примени се осум пациенти, меѓу кои тројца малолетници (15 и 16 години), а останатите се на возраст од 19 до 31 година. Петмина се на механичка вентилација.

Во Варна, во Воено-медицинската академија, се лекуваат тројца пациенти на возраст од 15, 17 и 20 години, од кои двајца се на респиратор.

Во Пловдив, во болницата „Св. Георги“, примени се тројца повредени (19, 21 и 49 години) со сериозни изгореници и оштетувања од вдишани токсични гасови.

Министерството за здравство на Бугарија обезбеди термини за роднините да добијат информации за состојбата на пациентите, а достапна е и 24-часовна телефонска линија (+359 2 8050 300).

Бугарската амбасада во Скопје соопшти дека ќе обезбеди превоз и сместување за семејствата на повредените што се лекуваат во Бугарија.

Во Македонија моментално се лекуваат 84 повредени, додека во странство се испратени 51, соопшти министерот за здравство Арбен Таравари.