Skip to content
Илон Маск објави дека Тесла ги засилила безбедносните мерки во своите продажни салони и ги активирала сите возила со „Sentry Mode“ по серијата вандализми и протести насочени против него и компанијата. Маск, кој истовремено советува и американскиот претседател Доналд Трамп, информираше дека оваа мерка е воведена како одговор на растечките напади врз Тесла во последно време.
„Sentry Mode“ е безбедносен систем кој користи камери и сензори на автомобилите за да открие сомнителни активности во околината и да ги сними. Според прирачникот за Model 3, „Sentry Mode е интелигентен систем кој ви овозможува да бидете предупредени за потенцијални закани во близина“.
Тесла истакнува дека секое возило на компанијата има најмалку седум камери, што ги прави автомобилите на Тесла ефективни за снимање и пријавување на сомнителни активности.
Во последните недели, Тесла беше мета на вандализми, вклучувајќи напади врз дилерските салони, магацините, полначите и приватните автомобили во САД и други делови на светот. Полицијата во Онтарио, Канада, истражува напади врз околу 80 возила, вклучувајќи изгребани автомобили и исечени гуми.
Покрај тоа, Тесла беше исклучена од меѓународниот саем за автомобили во Канада поради безбедносни причини.
Тројца Американци се соочуваат со федерални обвиненија за напади врз Тесла објекти во три американски сојузни држави. Јавниот обвинител Пем Бонди предупреди дека Министерството за правда ќе ги процесуира сите кои се вклучат во овој бран на напади против Тесла, нарекувајќи ги актите „домашен тероризам“.
Овие напади се случуваат во време кога Илон Маск го води Одделот за владина ефикасност (DOGE), кој има задача да ги намали владините трошоци. За време на претходниот мандат на Трамп, неговите имоти беа цел на протести, а сега изгледа дека Тесла е новата цел. Маск продолжува да ги води Тесла, X, SpaceX и други компании, додека истовремено го советува претседателот Трамп.
