Skip to content
Пелистерка АД Скопје, заедно со своето поврзано правно лице ТИМОХ ДОО Скопје, тврди дека до овој момент нема донесено одлука на Акционерското собрание за продажба на Стопанска банка АД Битола. Како квалификувани акционери, кои поседуваат 21.85% од акциите на банката, тие инсистираат на тоа дека секоја информација која се однесува на продажба или трговија со акции на банката е предмет на строг надзор од страна на Народната банка на Република Северна Македонија.
„Банкарскиот пазар во Република Северна Македонија е строго регулиран, а сите трансакции кои се поголеми од 5% на акциите на Стопанска банка АД Битола мора да бидат одобрени од Народната банка“, изјави портпарол на Пелистерка АД Скопје. Според соопштението, сите потенцијални инвеститори кои сакаат да стекнат поголем пакет на акции треба прво да добијат одобрение од Народната банка, а потоа да достават соодветна понуда до акционерите.
Во соопштението, исто така, се нагласува дека сите неофицијални информации кои се објавуваат без следење на законските процедури и без вклучување на Народната банка, се само шпекулации. „Тие не само што го загрозуваат стабилното функционирање на банката, туку носат и основани сомневања за кривична одговорност“, додаваат од Пелистерка АД Скопје.
Како што посочуваат акционерите, одлуката за продажба на Стопанска банка АД Битола може да биде донесена само ако добие поддршка од мнозинството акционери. „До овој момент нема таква одлука“, вели портпаролот.
Пелистерка АД Скопје апелира до медиумите и сите засегнати страни да се воздржат од пласирање на шпекулативни информации кои можат да наштетат на тековното работење на Стопанска банка АД Битола. „Очекуваме дека Управниот одбор на банката ќе свика Акционерско собрание за да ја усвои завршната сметка која покажува одлични резултати“, изјавуваат од Пелистерка АД Скопје.
