Грција во колапс: 24-часовен штрајк со прекини во сообраќајот и образованието

Денеска во Грција се одржува 24-часовен штрајк организиран од најголемите два синдикати во земјата, Генералната конфедерација на грчките работници (ГСЕЕ) и синдикатот на јавниот сектор АДЕДИ. Штрајкот е одговор на барањата за зголемување на платите и намалување на инфлацијата.

Овој штрајк ќе предизвика значителни прекини во сообраќајот низ државата, како и во образованието и општинските служби. Контролорите на летање ќе се приклучат на штрајкот, што ќе резултира со прекин на воздушниот сообраќај, а фериботите ќе бидат застанати поради учеството на Панхеленската федерација на морепловци (ПНО).

Во Атина, метрото ќе работи само од 10 до 17 часот, додека железничките услуги, вклучително и приградската железница, ќе бидат целосно прекинати. Автобусите и тролејбусите ќе сообраќаат од 9 до 21 часот, а надвор од овие часови сообраќајот ќе биде во прекин. Приградските автобуси се очекува да сообраќаат по нормален распоред.

Синдикатите, во своите барања, се фокусираат на колективни договори за работа, зголемување на платите и враќање на 13-ти и 14-ти месечни плати.