Skip to content
Швајцарскиот фармацевтски гигант „Рош“ денес објави дека ќе инвестира 50 милијарди долари во своите операции во Соединетите Американски Држави во текот на следните пет години. Извршниот директор на „Рош“, Томас Шинекер, изјави дека инвестицијата ја покажува нејзината „долгогодишна посветеност на истражувањето, развојот и производството во САД“.
Како што е наведено, инвестицијата ќе создаде повеќе од 12.000 работни места во Америка, од кои 1.000 во самата компанија, а останатите за поддршка на нови производствени капацитети. Фармацевтската компанија ќе инвестира пари во создавање нови локации за истражување и развој (R&D), а воедно ќе ги зајакне и прошири производствените капацитети во Индијана, Пенсилванија, Масачусетс и Калифорнија.
Новото место за истражување и развој во Масачусетс ќе се користи за истражување на вештачката интелигенција (ВИ) и ќе функционира како истражувачки центар за кардиоваскуларни, бубрежни и метаболички третмани.
Компанијата „Рош“ прецизираше дека на крајот од овој инвестициски циклус ќе извезува повеќе лекови од САД отколку што увезува. Компанијата, исто така, изјави дека веќе вработува повеќе од 25.000 луѓе во Соединетите Американски Држави, објави CNN.
Американскиот претседател Доналд Трамп се закани дека ќе воведе нови царини за фармацевтската индустрија, а многу големи компании како „Новартис“ и „АстраЗенека“ претходно објавија дека ќе го зголемат своето присуство во САД за да ги избегнат најавените мерки.
