Позната компанија го затвора својот погон во Германија – Купувачите се шокирани

Стотици работници се соочуваат со неизвесна иднина, откако култниот прехранбен бренд Danone објави дека ќе ја затвори својата фабрика во Германија. Оваа одлука не ги засега само вработените – изненадени се и купувачите, кои не можат да го разберат ваквиот чекор.

Минималната плата, високите стандарди за безбедност, рамнотежата меѓу работата и приватниот живот – сите тие се легитимни интереси на работниците во Германија. Но, сè погласно се слушаат поплаки од големите корпорации дека Германија е скапа локација за водење бизнис.

Според едно истражување, 14% од компаниите размислуваат да ја напуштат Германија доколку трошоците останат на сегашното ниво. Иако е тешко точно да се утврди колку фирми веќе се повлекле, ова се смета за значаен товар за корпорациите.

„Фабриката повеќе не е профитабилна“

Планираното затворање на Danone ќе се случи до крајот на 2026 година и ќе ги засегне 230 вработени во млекарницата во Охсенфурт. Компанијата ја оправдува одлуката со објаснување дека производниот капацитет значително опаднал и дека фабриката повеќе не е профитабилна.

Во 2024 година, искористеноста на капацитетите била преполовена во споредба со 2019. Во соопштението од Danone се наведува дека ваквиот чекор бил неопходен за компанијата да остане конкурентна. Дополнителен проблем е што трошоците во Охсенфурт се значително повисоки во споредба со други европски погони.

И покрај затворањето во Охсенфурт, Danone најави дека ќе продолжи да вложува во својата фабрика во Фулда, каде моментално работат околу 600 лица.

Сепак, останува неизвесно какво влијание ќе има затворањето врз локалната заедница и врз околу 70 млекарници, кои имаат договори со фабриката во Охсенфурт. Германските медиуми посочуваат дека тоа ќе зависи од идниот пристап на Danone кон локалното производство.