Ќе се плаќа излетничка такса за шетање во Херцег Нови

Од ова лето, туристите кои организирано ќе го посетуваат Стариот град во Херцег Нови ќе треба да платат излетничка такса од еден евро, првпат откако е воспоставен ваков модел во овој приморски град.

Како што пренесува „Новски портал“, таксата се однесува само на организирани групи со туристички водичи. Тие ќе треба да се јават во туристичко-информативниот биро каде ќе пополнат ваучер и ќе ја извршат уплатата.

Од Туристичката организација на Херцег Нови појаснуваат дека не очекуваат веднаш широка примена на оваа мерка, особено не кај излетниците кои пристигнуваат со бродови од Будва, Тиват и Котор.

Сепак, локалните власти сметаат дека оваа симболична такса ќе придонесе за подобра организација на туристичките посети и дополнителни приходи за развој на туристичката понуда.