Skip to content
Според полицијата, во саботата, во вториот круг младински протести низ Германија учествуваа значително помалку луѓе отколку пред две недели, а демонстрациите поминаа главно мирно.
Во Берлин, според полицијата, вечерта се собраа околу 700 луѓе. Организаторите пријавиле демонстрации за само 100 учесници. Полицијата преку платформата X соопшти дека 22 лица се приведени поради разни прекршоци, меѓу кои и за наводно фрлање пиротехнички средства. За следење на протестот биле ангажирани околу 700 полицајци. Според извештаите, повредени се двајца полицајци.
Во северниот град Бремен, во протестот во центарот на градот учествуваа до 670 луѓе, изјави портпаролка на полицијата. Организаторите очекуваа околу 2.000 учесници.
И во градовите во западниот дел на земјата посетеноста беше помала од очекуваната – во Вупертал маршираа 80 луѓе, а во Дизелдорф 100.
Протестите беа организирани од иницијативата „Gen Z regelt“ („Генерацијата Z презема контрола“), која изнесе низа барања: од поголемо финансирање за училиштата, услуги за справување со зависности и психотерапија, до мерки за справување со зголемените трошоци за живот, поголема социјална правда и посилни климатски акции. Иницијативата, исто така, се противи на воведувањето задолжителен воен рок и на проширувањето на државниот надзор.
Пред две недели, десетици илјади млади луѓе се приклучија на првиот круг протести на оваа иницијатива во градови низ целата земја. Иако повеќето собири поминаа мирно, некои беа проследени со насилни судири. Младинската иницијатива подоцна се огради од насилството.
Следниот петок во Германија и на други места во Европа се очекуваат многу помасовни протести, како дел од младински штрајк на ниво на целиот континент. Во Берлин, организаторите пријавиле демонстрации за 15.000 учесници.
Протести се очекуваат и во земји како Франција, Италија, Шпанија, Белгија и Обединетото Кралство.
