Skip to content
Министерството за внатрешни работи склучи тригодишна рамковна спогодба вредна 59 милиони денари со ДДВ, односно околу 959 илјади евра, за изнајмување печатачи и мултифункционални фотокопирни апарати. Работата ја доби скопската фирма „Рикомак копир-сервис“, покажува документацијата за јавната набавка што ја разгледа Рацин.мк.
Спогодбата е склучена на 9 ноември 2026 година, а известувањето до Бирото за јавни набавки е доставено на 11 ноември. Вредноста без ДДВ изнесува 50 милиони денари, додека данокот е дополнителни девет милиони денари.
Предвидено е изнајмување на најмногу 1.000 уреди за организационите единици на МВР низ целата држава. Според техничката спецификација, апаратите треба да бидат половни, но не постари од три години. Набавката опфаќа девет типа уреди, од црно-бели ласерски печатачи до мултифункционални апарати за печатење, копирање и скенирање, вклучително и во боја.
Во цената се вклучени редовен и вонреден сервис, резервни делови, тонери, фотокондуктори, транспорт и работна рака. Фирмата треба бесплатно да ги инсталира уредите и да ги интегрира со софтверското решение во постојната локална мрежа на Министерството.
За пријавен дефект е предвидена реакција во рок до 24 часа, а за отстранување на дефектот најмногу 48 часа по направениот увид. Доколку уредот не може да се поправи, предвидена е замена во рок од 72 часа.
На тендерот пристигнале четири понуди, од „Дуна“, „Стерна“, „Рикомак копир-сервис“ и „Импегна“. Критериум за избор била најниската цена, а според известувањето, не била спроведена електронска аукција.
Документацијата предвидува и софтвер за следење и контрола на печатењето, со евиденција на испечатените страници и извештаи за користењето на уредите. За дел од апаратите, по барање на МВР, се предвидени безбедно печатење со картичка или ПИН, автентикација на корисниците и криптирање.
Износот од 59 милиони денари е вкупната вредност на рамковната спогодба, а не веќе извршена исплата. Таа важи три години или до исцрпување на предвидените средства. Врз нејзина основа ќе се склучуваат поединечни договори, чија вкупна вредност не смее да го надмине утврдениот износ.
