Католичката црква во Србија донесе одлука: Еве како ќе го нарекуваат новиот папа

Објавена е официјалната одлука на кардиналот Ладислав Немет, белградски надбискуп, во врска со името на новоизбраниот папа.

Официјалната наредба од кардиналот Ладислав Немет, SVD, надбискуп и митрополит на Белград, е објавена во средата, на 13 мај, и е упатена до сите свештеници, монаси, монахињи и верници. Во продолжение следи целосниот текст:

„Почитувани браќа свештеници, монаси и монахињи, драги верници!

Црквата, водена од Светиот Дух, продолжува да чекори низ историјата како невестата Христова и народот Божји, собран околу наследникот на Свети Петар. Со радост ве известуваме дека, по одлуката на кардиналскиот колегиум и по надахновение од Светиот Дух, Црквата доби нов римски првосвештеник. Неговата Светост, папата Леон, е избран да ја води Христовата Црква во верата, единството и љубовта, како наследник на апостолот Петар.

Согласно тоа, нашиот ценет кардинал д-р Ладислав Немет, белградски надбискуп и митрополит, наложува – во согласност со важечките одредби од Кодексот на канонското право (кан. 838 §4) и со важечките литургиски прописи на Црквата – да се изврши промена во изговарањето на евхаристиските молитви за време на светата миса.

Од денот на објавување на оваа одредба, во сите свети миси што се служат на територијата на Белградската надбискупија, во еухаристиската молитва при споменувањето на папата, ќе се изговара името на новиот папа – Леон.

Оваа промена стапува на сила веднаш и ги обврзува сите свештеници и ѓакони што претседаваат со светите литургии – како во парохиските заедници, така и во манастирските и монашки капели, црковни установи и други пасторални околности.

Ги повикуваме сите служители на олтарот со должно почитување, внимание и верност да ја пренесат оваа промена на Божјиот народ, потенцирајќи ја важноста на единството на Црквата околу наследникот на Петар. Литургиското спомнување на папата во светата миса е знак на нашата црковна поврзаност, послушност и заедништво со Римската црква.

Нека новата етапа во животот на општата Црква, под водство на Светиот Отец Леон, биде благословена и нека нè води кон подлабоко единство со Христос, нашиот единствен Спасител.“

Соопштението е испратено од пречасниот Иван Полето, канцелар на Белградската надбискупија.