Skip to content
Украинскиот претседател Володимир Зеленски има пиштол и би се борел до смрт со својот поблизок круг на луѓе доколку Русите упаднале во неговиот штаб во Кијив на почетокот на инвазијата, изјави тој синоќа во интервју за телевизијата 1+1, објавија странските медиуми.
Знам да пукам. Можете ли да го замислите насловот „Русите го фатија украинскиот претседател“? Тоа би било срамно, рече Зеленски во интервјуто.
Во првите денови по инвазијата на 24 февруари минатата година, руските разузнавачи се обидоа да упаднат во Кијив, но не успеаја да стигнат до улицата Банкина, каде што се наоѓа претседателската канцеларија. Другите руски трупи почнаа да ги напаѓаат предградијата на Кијив, но не напредуваа далеку. Во градот имаше и обиди за саботажа.
Да упаднеа внатре, сега немаше да разговараме. Никој немаше да биде заробен бидејќи ќе се боревме до крај. До последно, истакна Зеленски.
На прашањето дали има пиштол и дали вежбал со него, украинскиот претседател одговори потврдно.
Во своето традиционално обраќање до јавноста синоќа, тој ги обвини руските војници дека се виновни за воени злосторства исто како и нивното раководство.
Не само командантите, туку сите вие, сите сте терористи и убијци и сите мора да бидете казнети. Секој што пилотира и испалува проектили, кој одржува авиони и бродови што се користат за тероризирање, сите вие сте соучесници во злосторството, нагласи Зеленски.
Неговата изјава следува по ракетниот напад врз украинскиот град Уман во петокот, во кој загинаа 23 лица. Меѓу нив, рече Зеленски, имало шест малолетници. Тој повтори дека треба да се формира специјален меѓународен суд за руските злосторства во Украина по моделот на Нирнбершките процеси против нацистите.
Г. Т. (ЦивилМедиа)
