Skip to content
Според координаторката на советничката група на СДСМ и коалицијата во Советот на Град Скопје, Љубива Јанчева, еден од најсериозните урбани скандали во последната деценија, е што за над 150 дивоградби во Чаир нема никаква институционална реакција.
„И наместо овој скандал да биде предмет на итна истрага, санкции и одговорност – власта ја штити урбаната мафија. Се издавале фалсификат решенија, се правеле згради каде што требало да има улици, со еден збор тотален хаос. И наместо акција на институциите, Мицкоски зборува за “дестабилизација”, истиот рефрен кој го слушавме од Груевски кога се обидуваше да прикрие криминал“, рече Јанчева.
Таа потенцираше дека јавноста веќе знае: ‘Кога ВМРО-ДПМНЕ зборува за дестабилизација – некој од нив е фатен на дело!’
„Кој интерес стои зад заштитата на овие 150 дивоградби? Зошто Мицкоски не бара одговорност од своите коалициски партнери во ВЛЕН? Зошто Панче Тошковски не отвора истрага? Кој го контролира урбаниот криминал во Чаир – и што добива ВМРО-ДПМНЕ за возврат? Овој скандал е тест за владеење на правото. А власта падна на тој тест. Наместо санкции – штитат криминал. Наместо постапки – закани и сценарија за страв.“, рече Јанчева.
Советничка група на СДСМ бара вонредна седница на Советот на Град Скопје.
„Советот има обврска за вака важно прашање да дискутира, да видиме дали и во други општини под власт на ВМРО-ДПМНЕ, ВЛЕН и ЗНАМ има вакви криминали со дивоградби. Ова не е политичка битка – ова е борба за поредок, за правда и за скопјани. СДСМ ќе продолжи да ја разоткрива оваа криминална спрега и ќе инсистира на правна разврска. Урбаната мафија мора да падне, а граѓаните да добијат држава во која владее законот – не интересот на партиите на власт“, посочи Јанчева.
