Франција на нозе: најмалку 99 уапсени, повредени во Лион

Низ Франција денеска се одржаа масовни протести против најавените буџетски кратења и реформите на владата, со судири со полицијата во повеќе градови има и десетици приведени. До попладне, бројот на уапсени достигна најмалку 99, од кои 15 во парискиот регион, јави BFM TV.

Во Лион беа повредени тројца, меѓу кои еден новинар и еден полицаец, по фрлање проектили кон полицијата. Демонстранти накратко влегле во комплексот на Министерството за економија во Париз, а образовните власти соопштија дека 23 училишта биле целосно блокирани, а 52 со „филтер-блокади“. Во Марсеј марширале околу 15.000 луѓе.

Агенциите јавуваат за широк дострел на протестите и силно полициско распоредување. AP извести за повеќе од 90 апсења и значителни нарушувања во транспортот, со солзавец и барикади на повеќе локации. Истовремено, според „Гардијан“, до пладне биле регистрирани 94 апсења низ земјата при маршевите и штрајковите против кратењата, со жаришта во Нант и Лион. Турската агенција „Анадолија“ наведе бројка што се совпаѓа со извештаите на BFM – 99 уапсени, од кои 15 во парискиот регион.

Денешниот бран протести следи по серија акции на движења и синдикати против владините мерки и го тестира авторитетот на новиот премиер Себастијен Лекорни. Полицијата беше масовно распоредена, а локалните власти предупредуваа на можни прекини во градскиот и железничкиот сообраќај.