Skip to content
Грчката изведувачка и уметница Клеоники Демири повторно музицира во Скопје — и тоа со причина која ѝ е блиска и лична: концерт по повод 100 години од раѓањето на легендарниот композитор Микис Теодоракис.
„Настапот во Националната опера на Северна Македонија за мене е голема чест и радост. Тоа е можност да ве запознаам како народ, преку музиката,“ изјави Демири во интервју за МИА. Ова ѝ е трет концерт во нашата земја, а најновиот ќе се одржи на 8 октомври.
Сцената и публиката во Скопје ѝ станале добро познати и блиски. Демири го пренесува своето чувство дека музиката е универзален јазик што ги обединува луѓето, без разлика на границите. Вели дека токму оваа поврзаност ја осетила уште од првиот настап во Скопје во 2020 година.
Уметничкиот свет на Клеоники Демири е уникатен спој на традиција и модерност — нејзиниот музички израз ги поврзува медитеранските ритми, латинските тонови и „ентехно“ жанрот, карактеристичен за грчката уметничка сцена. На сцената настапува со голема емоција, а тоа публиката секогаш го препознава.
Во новиот концерт, Демири настапува заедно со тројца истакнати музичари од Грција, двајца од кои лично соработувале со Теодоракис. Самиот концерт е омаж на композиторот кој, според Демири, преку својата музика испраќал пораки за мир, пријателство и социјална правда – вредности што таа и нејзините колеги ќе се обидат да ги пренесат и на публиката во Скопје.
На прашањето дали е отворена за соработка со македонски уметници, Демири со насмевка одговара: „Секако! Ми давате идеи… и веќе ми доаѓаат на ум некои песни!“