Skip to content
„Ние сме шампиони на уставните промени, 36 пати. Повеќето од промените ни беа наметнати, па можеби треба да ја промениме преамбулата и да напишеме: „Ние, граѓаните и Европската Унија или соседите“, рече претседателката на Северна Македонија, Гордана Сиљановска-Давкова, на Самитот за проширување на ЕУ на „Еуроњуз“ на 3 ноември.
Таа изрази увереност дека Европската Унија сè уште може да најде креативно решение за спорот.
„Мојот легитимитет доаѓа од граѓаните и им припаѓа ним. Како тогаш можам да ѝ ветам на Европската Унија дека ќе го промениме Уставот? Јас не сум апсолутен монарх. Го започнавме овој процес, но предложените амандмани не ја поминаа ниту првата фаза, разгледувањето во уставната комисија. Не можам да гарантирам дека Уставот ќе се промени. Но, можам да гарантирам дека историски, културно и географски отсекогаш сме биле дел од Европа и заслужуваме и политички да ѝ припаѓаме. 80% од граѓаните се против уставните промени, но поддршката за ЕУ е околу 70%, бидејќи ние на Балканот отсекогаш сме се чувствувале Европејци и ги споделуваме истите вредности“, рече Силјановска.
Според Сиљановска-Давкова, сепак, главната пречка за европската интеграција на нејзината земја не е недостатокот на реформи или неисполнувањето на барањата на ЕУ, туку недостатокот на политичка волја кај соседните земји.
„Сè уште верувам дека ЕУ ќе најде решение затоа што Европската Унија е многу креативна. Имало и други случаи. Можеби Член 7 е заборавен. Член 7 од Договорот за Европската Унија предвидува дека една третина од земјите-членки можат да покренат постапка пред Советот. И знаете, пиејќи кафе, се сеќавате… Да, има многу креативни решенија. Она што ме загрижува е зошто да трошиме енергија, зошто да не се фокусираме на главните карактеристики на ЕУ“, рече Сиљановска-Давкова.
Со зборови за „паузата за кафе“, таа реферираше на самитот на ЕУ во декември 2023 година, кога Виктор Орбан ја напушти просторијата за состаноци по предлог на Олаф Шолц, дозволувајќи им на другите европски лидери да одобрат отворање преговори со Украина.
Сиљановска додаде дека Северна Македонија е единствената меѓу земјите што чекаат членство што 100% ја координирала својата надворешна и безбедносна политика со онаа на ЕУ. Таа тврди дека тешкотиите околу пристапувањето во ЕУ се продолжение на долгата историја на отстапки на Северна Македонија во нејзината кандидатура за членство.
Сиљановска-Давкова посочи на договорот од 2018 година со Грција според кој земјата го смени своето име од Република Македонија во Северна Македонија, со што се стави крај на деценискиот спор што го попречуваше нејзиниот обид за членство во НАТО и ЕУ.
Таа вели дека барањето за уставни измени го поставува прашањето колку далеку мора да оди земјата-кандидат во задоволувањето на „билатералните барања“ пред да се приклучи на Унијата.
Таа рече дека се обидува да воспостави дијалог со бугарските власти.
„Се трудам. Се сретнав со претходниот претседател, кој сега е премиер, во дух на добра волја. Се сретнав и со претседателката, ги изразив истите ставови и ќе продолжам да го правам тоа. Само преку дијалог можеме да се обидеме да најдеме решенија. Но, знаете, ако моделот, ако форматот на дијалогот е ‘слушај и имплементирај, јас сум земја-членка, ти не си и јас имам право на вето, а ти не“, тогаш има проблем, бидејќи дијалогот значи еднаквост меѓу учесниците“, нагласи во интервјуто за Еуроњуз, претседателката на Северна Македонија Гордана Сиљановска-Давкова.
