Skip to content
Со заедничко пеење на неговите хитови, неколку стотици шибенчани на 2 ноември му оддадоа последна почит на Мишо Ковач. На плоштадот меѓу катедралата „Свети Јаков“ и Градското собрание, родниот град на пејачот се собра на музичко испраќање што траеше околу еден час.
Низ плоштадот одекнуваа „Далмација у мом оку“ и „Ако ме оставиш“, а присутните заедно ги пееја песните со кои Ковач одбележа повеќе генерации. Собирот го организираше шибенскиот музичар Карло Орбаниќ, кој на истото место веќе три години организира музички дружења во божиќниот период.
Орбаниќ објасни дека идејата била граѓаните заедно, преку песна, да му оддадат почит на својот сограѓанин.
„Нека неговите песни уште еднаш нè обединат, како што го правеа тоа со децении“, порача тој.
Мате Мишо Ковач е роден на 16 јули 1941 година во Шибеник, каде што го поминал детството и ги направил првите музички чекори. Во кариерата подолга од шест децении стана еден од најпопуларните хрватски пејачи, со песни што го пренесуваа далматинскиот дух и стигнаа до публика низ целиот регион. Почина на 31 октомври, на 85-годишна возраст.
Неговата врска со родниот град се одржуваше и преку настапите. „Јутарњи лист“ потсетува дека во 2016 година пеел во центарот на Шибеник, кога градот ја одбележувал 950-годишнината од првото споменување.
По Шибеник, за 3 ноември е најавено испраќање и на стадионот „Пољуд“ во Сплит. Хрватската влада истиот датум го прогласи за Ден на национално сочувство по повод смртта на пејачот, со спуштање на знамињата на половина копје.
Ковач ќе биде погребан на загрепските гробишта Мирогој, покрај синот Еди. Според „Слободна Далмација“, семејството побарало погребот да се одржи во најтесниот круг на роднини и пријатели.
