Skip to content
Словенија не ѝ поставува неразумни пречки на Србија на патот кон Европската Унија, уверува шефот на словенечката дипломатија Тоне Кајзер, откако премиерот Јанез Јанша најави дека Љубљана нема да дозволи напредок во преговорите без предавање на архивите на поранешните југословенски служби.
Во интервју за австриската новинска агенција АПА, Кајзер рече дека изјавите на Јанша биле извлечени од контекст. Тој ја поддржа европската интеграција на Западен Балкан, но нагласи дека за следните чекори на Србија треба да се почека формирањето на новата влада и нејзината програма.
Спорот се отвори по победата на Студентската листа на српските парламентарни избори. Јанша порача дека ќе ја поздрави определбата на новите власти за забрзување на преговорите со ЕУ, но веднаш постави услов. Побара Србија да ги предаде сите архиви на УДБА, Службата за државна безбедност, ЈНА и другите поранешни југословенски служби што се однесуваат на Словенија.
Подоцна словенечкиот премиер објасни дека барањето не е ново и дека станува збор за исполнување на обврските од договорот за сукцесија на поранешна Југославија.
На условувањето реагираше и Европската комисија. Од Брисел порачаа дека пристапните преговори се водат според спроведените реформи, владеењето на правото и демократските критериуми. Билатералните прашања, нагласија од Комисијата, не се дел од преговорите и треба да се решаваат конструктивно.
Дополнителен проблем е достапноста на бараната документација. Директорот на словенечкиот државен архив Андреј Наред изјави дека Србија претходно официјално одговорила оти дел од архивите бил уништен или тешко оштетен при бомбардирањето на зградата на српското Министерство за внатрешни работи во 1999 година.
Кајзер се осврна и на спорните прашања меѓу Хрватска и Црна Гора, кои влијаат врз приближувањето на Подгорица кон ЕУ. Тој предложи Словенија и Австрија да посредуваат во нивното решавање и оцени дека Црна Гора сè уште има добри изгледи да стане членка во 2028 година.
