Орбан со петиција ќе ја спасува Русија од исцрпување од војната во Украина

Премиерот на Унгарија Виктор Орбан најави започнување на национална петиција чија цел е да се спречат т.н. „воени планови на Брисел за Украина“.

Иницијативата доаѓа во време на нов дипломатски спор меѓу Киев и Будимпешта, кој е интензивиран со меѓусебни обвинувања за шпионажа. Во меѓувреме, Европската Унија истражува наводни унгарски шпионски активности во рамките на заедницата, пишува Киев Пост.

Во објава на Фејсбук, Орбан го повтори своето противење против она што тој го нарекува „воен план од Брисел“. „Пред неколку недели, во Копенхаген, беше претставен воениот план на Брисел: Европа плаќа, Украинците се борат, а Русија ќе биде исцрпена“, напиша тој, осврнувајќи се на дискусиите за европското финансирање на испораките на оружје за Украина.

Тој ги обвини европските институции и западните медиуми за водење „кампања за одмазда“ против Будимпешта. „Во Данска јасно кажав: ние не го сакаме ова. Оттогаш, тие започнаа кампања против Унгарија. Арсеналот е огромен: обвинувања за шпионажа, скандали со лажни вести и правни маневри“, изјави Орбан.

Неодамна, Владата во Будимпешта забрани неколку украински публикации, оправдувајќи ја одлуката како „реципрочна“ и поврзана со „пропагандистичките активности на Фондацијата Сорос“.

„Затоа, денеска почнуваме да собираме потписи против воените планови на Брисел. Ќе бидеме присутни во секој град и село, бидејќи сега ни е потребен секој Унгарец кој го сака мирот“, напиша вчера унгарскиот премиер, најавувајќи голема кампања во земјата.

Орбан и претходно организираше национални анкети за да ги оправда позициите на владата. Сепак, унгарскиот печат ги критикуваше овие јавни консултации, обвинувајќи ги за пристрасни формулации. Според весникот Telex, претходно истражување за „заштита на суверенитетот“ ги поттикнало гласачите да изберат меѓу поддршка на Владата на Орбан и „живот во мигрантско гето“, формулација наменета да ја обесхрабри опозицијата.