Skip to content
Основното јавно обвинителство – Кавадарци прими кривични пријави од полицијата против две вработени во основно училиште во Кавадарци, под сомнеж за „оштетување и неовластено навлегување во компјутерски систем“ и „злоупотреба на лични податоци“. Според пријавите, наставничката В.Т. (47) на 4 септември на службем лаптоп затекнала отворен приватен профил на колешка на социјална мрежа и неовластено фотографирала лични разговори. Потоа, откако ја пронашла лозинката, на 5 и 7 септември повторно пристапила и снимала приватни пораки, кои – како што стои во пријавата – ѝ ги предавала на директорката М.Т. (52), а таа ги проследувала до други колеги.
Инцидентот добил дополнителна тежина на 19 септември, на наставнички совет, кога оштетената укажала дека неовластено се фотографирани нејзини приватни разговори. Тогаш, според полицискиот навод, директорката М.Т. ѝ се заканила дека доколку случајот се пријави, „сите пораки што ги поседува“ ќе ги испрати до други колеги. ОВР Кавадарци денес до ОЈО поднесе пријави за кривични дела по член 251 (оштетување и неовластено навлегување во компјутерски систем) и член 149 (злоупотреба на лични податоци) од Кривичниот законик.
Случајот отвора важни прашања за дигиталната етика во училиштата: службените уреди се обврзани со строги правила за пристап и заштита на податоци, а приватните профили – дури и кога случајно се оставени отворени – не смеат да станат предмет на „лов“ по содржини. Ако наводите се потврдат, ова не е само дисциплински прекршок, туку и кривична зона со потенцијални санкции. Правилата за заштита на лични податоци и информатичка безбедност не се формалност, туку заштита на достоинството и приватноста – особено во средина каква што е училиштето, каде довербата е предуслов за работа.