Киев: Дел од Бахмут сè уште е под контрола на Украина

Украински војници сè уште има во окупираниот источен украински град Бахмут, соопшти официјален Киев по тврдењата од Русија дека нејзините сили го зазеле целиот град по неколкумесечни борби.

– Нашите војници контролираат одредени објекти во Бахмут и секторот со семејни куќи во областа „Авион“ (Літак), соопшти заменик-министерката за одбрана Хана Малиар на Телеграм.

Таа информира дека борбите продолжуваат околу ридовите северно и јужно од градот, и оти руските трупи носат дополнителни резерви.

– Одбраната на Бахмут ја исполнува својата воена задача, нагласи Малиар додавајќи дека „офанзивниот потенцијал на непријателот е значително намален и се нанесени огромни загуби на непријателот“.

Според неа, украинската армија „добила на време“ за одредени дејствија.

Во и околу Бахмут во регионот Доњецк со месеци се водат борби. За време на викендот, Москва најави целосно освојување на речиси сосема уништениот град, кој некогаш имал 70.000 жители