Утре почнува процесот за трагедијата во дискотеката „Пулс“ што го потресе Кочани

Утре, во тивките ходници на затворот „Идризово“, ќе започне судскиот процес за најголемата трагедија што ја паметат Кочани и цела Македонија. На 16 март, во дискотеката „Пулс“, огнот проголта 63 животи и повреди повеќе од 200 млади луѓе кои само излегле да се забавуваат. Половина година подоцна, судницата ќе се отвори за да се слушне вистината – или барем обид за неа.

Во публиката утре ќе седнат семејства што со месеци живеат меѓу болка и гнев. По ходниците ќе чекорат обвинители, правници, адвокати – но и спомени, кои тешко се затвораат во правни рамки. Државниот јавен обвинител Љупчо Коцевски најави тим од околу 15 обвинители. Нивниот товар е да ги поврзат сите нишки од системските пропусти за кои јавноста веќе одамна шепоти – а дел од семејствата гласно обвинува.

Обвинението, поднесено во јуни, опфаќа 34 физички и три правни лица. Меѓу нив се тројца поранешни градоначалници на Кочани, директори од Дирекцијата за заштита и спасување, државни службеници, поранешни министри за економија, сопствениците на фирмата која управувала со „Пулс“, обезбедувачи, инспектори, архитектка… Сите тие, според обвинителниот акт, со години дозволувале објектот да работи без да ги исполнува ниту основните безбедносни стандарди.

Во приказната има и паралелни поглавја: во Кочани се води предистражна постапка против службеници на УЈП, а одвоено течат постапки против 13 полицајци поврзани со случајот. Сослушувањата се одложуваат, а одлуката на Јавното обвинителство се очекува на почетокот на декември.

Зад сите овие бројки, имиња и институции стои една слика што не избледува – пламен што за неколку минути го претвори ноќниот клуб во стапица. Семјествата и денес велат дека не бараат само вина; бараат разбирање, вистина, одговорност. И мир.

Утрешниот ден не е само судење – тоа е почеток на долг процес во кој општеството ќе мора да се соочи со сопствените пропусти. Судницата во „Идризово“ ќе стане место каде што за првпат, по трагедијата, сите ќе седнат очи во очи: институции, обвинети, преживеани и оние кои ги загубија најблиските.

Правдата можеби ќе биде спора – но за многумина, тоа е првиот чекор кон заздравување.