Skip to content
Хуманоидниот робот А2 на кинеската компанија AgiBot постави нов Гинисов светски рекорд, откако самостојно пропатува 106 километри низ источна Кина без да биде исклучен ниту еднаш. Маршрутата го одведе од езерото Џинџи во Суџоу до кејот во Шангај, а предизвикот траеше три дена и беше внимателно следен од инженерите и од претставниците на Гинис.
Предизвикот започнал на 10 ноември, на прометните патеки околу езерото во Суџоу, и завршил на 13 ноември на шангајскиот кеј. За тоа време А2 поминал 106,286 километри, што официјално е запишано како рекорд за „најдолга прошетка на хуманоиден робот“. Особено значајно е што за време на целото патување роботот не бил исклучен од напојување – благодарение на системот за замена на батерии „во живо“, со кој модулите се заменуваат без да се гаси уредот.
Од компанијата објаснуваат дека целта не била само симболично „пешачење“, туку демонстрација на стабилност и сигурност на технологијата. Висок 175 сантиметри и тежок 55 килограми, А2 е опремен со сензори управувани од вештачка интелигенција што истовремено обработуваат текст, звук и слика. Роботот може да извршува и прецизни моторни задачи, како протнување конец во игла, што досега се сметаше за домен на човечка спретност.
За време на тридневната прошетка А2 се движел по градски улици, пешачки коридори и делници од национални и покраински автопати. Наидувал на различни површини – од асфалт и тактилни патеки, до мостови, падини и делови со минимално ноќно осветлување. Компанијата нагласува дека роботот ги почитувал сообраќајните правила, преминувал на означени премини и се прилагодувал на пешаците и на околниот сообраќај.
Во техничка смисла, А2 се потпира на двојни GPS модули, LIDAR сензор и инфрацрвени камери за длабочина, што му овозможуваат прецизна навигација во комплексна урбана средина и во променливи услови на светлина. По завршувањето на патувањето инженерите забележале само абење на гумениот ѓон, додека сите други системи останале во функционална состојба – детал што AgiBot го користи како аргумент дека платформата е зрела за масовна комерцијална употреба.
Роботот што учествувал во предизвикот, според компанијата, не е посебно прилагоден прототип, туку стандардна комерцијална единица, идентична на оние што веќе им се испорачуваат на клиентите. Тоа е дел од пораката дека технологијата не е само лабораториски експеримент, туку производ подготвен за индустрија, логистика, услужни дејности и други сфери каде што хуманоидите треба да работат рамо до рамо со луѓето.
По прошетката А2 накратко „разговарал“ и со новинарите, опишувајќи го патувањето како „незаборавно искуство“ и шеговито додавајќи дека по толку километри му треба нов пар чевли. Од компанијата дополнително истакнуваат дека роботот поддржува повеќејазична интеракција, препознавање лица и меморија, како и автономно водење и известување за извршени задачи – способности што во иднина би можеле да го направат дел од екипите во фабрики, хотели, магацини или домови за стари лица.
Индустриските експерти го оценуваат подвигот како важна пресвртница во развојот на хуманоидната роботика. Според нив, скокот од минатогодишни „маратони на роботи“ до тридневна прошетка од над 100 километри покажува колку брзо напредуваат издржливоста, контролата на движењето и адаптацијата на роботите кон околината. Не е исклучено, велат тие, во блиска иднина роботите да ги стигнат или дури да ги надминат луѓето во серија физички задачи што бараат прецизност, сила и издржливост.
