Skip to content
Највисоката судска инстанца на Европската унија, Европскиот суд на правда (ECJ), пресуди дека безалкохолен напиток не смее да се продава како џин, бидејќи ова име е резервирано за специфичен алкохолен пијалак.
Судот во Луксембург соопшти дека одлуката е донесена на барање на германски суд, кој од ECJ побарал разјаснување дали називот „безалкохолен џин“ е спротивен на законите на Европската унија.
Претходно, едно германско здружение од судот во Потсдам побарало да се забрани продажбата на пијалакот „Вирџин џин без алкохол“, оценувајќи дека тој назив ја прекршува директивата на ЕУ за дефинирање, опишување, рекламирање и етикетирање на жестоки пијалаци, бидејќи џинот е исклучиво пијалак произведен од земјоделски етил алкохол ароматизиран со смрека.
Судот во Потсдам го потврдил барањето на здружението, но сепак се обратил до ECJ за совет, во дилема дали со таа одлука ги нарушува претприемачките слободи.
ECJ оцени дека „правото на ЕУ јасно забранува пијалак како овој да се нарекува и продава под етикетата ‘безалкохолен џин’, бидејќи не содржи алкохол“, и дека е „беспредметно на законски дефинираниот назив џин да се додаде зборот безалкохолен“.
„Во Повелбата за основните права на ЕУ, каде се втемелени и претприемачките права, нема ништо што ѝ противречи на оваа забрана“, наведе ECJ.
Судот додаде дека „забраната не ја спречува продажбата на конкретниот производ, туку единствено неговата продажба под име што е законски резервирано за одреден вид алкохолни пијалаци“.
Воедно, се наведува во соопштението, забраната е оправдана затоа што има цел да спречи забуна кај потрошувачите во однос на составот на некои производи и да ги заштити производителите кои ги исполнуваат европските законски барања од нелојална конкуренција.
