Научниците го шокираа светот со откритие за стареењето: Сè се менува околу оваа година од животот

Ново истражување открива изненадувачка вистина: човечкото тело влегува во фаза на брзо влошување околу педесеттата година, а крвните садови се првите што се погодени. Научниците предупредуваат дека тогаш се забрзуваат промените што влијаат на речиси секој орган, откривајќи пресвртница што би можела да го промени начинот на кој го разбираме стареењето и здравјето во втората половина од животот.

Иако времето поминува рамномерно, процесот на човечкото стареење во никој случај не е линеарен.

Текот на нашите животи, од детството, преку зрелоста, до староста, поминува низ различни фази, а нова студија открива важна пресвртница: околу 50-тата година, стареењето значително се забрзува, пишува Science Alert.

По таа граница, влошувањето на ткивата и органите станува многу побрзо отколку во претходните децении. Истражувањето, засновано на анализа на протеините во човечкото тело, покажа дека крвните садови се меѓу првите што покажуваат јасни знаци на забрзано стареење.

„Врз основа на промените на протеините поврзани со возраста, развивме специфични протеомски „часовници“ за различни ткива и го анализиравме патот на стареење на ниво на органи“, вели тим кинески научници.

„Временската анализа откри клучен пресврт околу 50-годишна возраст, при што крвните садови се меѓу најраните што стареат и се особено чувствителни на овој процес.“

Како дојдоа до откритието?

Иако луѓето живеат подолго од повеќето цицачи, тој продолжен животен век доаѓа со цена, опаѓање на функцијата на органите и поголем ризик од хронични заболувања. За подобро да ги разберат овие промени, научниците испитаа како протеините во различни ткива се менуваат со текот на годините.

Тие анализираа 516 примероци од 13 видови ткива, земени од 76 донатори на возраст од 14 до 68 години.

Примероците опфаќаа седум телесни системи, вклучувајќи кардиоваскуларни, дигестивни, имунолошки и респираторни. Научниците создадоа каталог на протеини и ги следеа нивните промени во текот на животот.

„Нашите наоди ја поставуваат основата за разбирање на човечкото стареење на ниво на целиот организам преку анализа на протеини“, велат истражувачите.

Кои органи стареат најбрзо?

Споредувајќи ги своите податоци со базите на податоци за болести, научниците откриле дека експресијата на 48 протеини поврзани со нарушувања како што се кардиоваскуларни заболувања, фиброза на ткивата и замастен црн дроб се зголемува со возраста. Најголемите промени се забележани помеѓу 45 и 55 години.

Во тој период, многу ткива минуваат низ значајни промени, а најизразените промени се случуваат во аортата, главната артерија што носи крв од срцето. Промени се забележани и во слезината и панкреасот, органи клучни за имунитетот и регулирањето на метаболизмот.

Потврда кај глувци

За да ги тестираат своите наоди, научниците извлекле протеин поврзан со стареењето од аортата на глувците и го инјектирале во младите животни. Глувците што го примиле овој протеин покажале пониска физичка способност, помала сила, помала издржливост и послаба координација во споредба со контролната група.

Студијата ги надополнува претходните истражувања.

На пример, еден американски тим претходно идентификувал два врва на забрзано стареење, околу 44 и околу 60 години, поврзани со промени во метаболизмот и функцијата на органите. Новите наоди потврдуваат дека стареењето е исклучително сложен процес што влијае на неколку телесни системи истовремено.

Разбирањето кога и како стареењето влијае на одредени органи може да биде клучно за развој на целни терапии.

„Овие резултати можат да помогнат во создавањето прецизни третмани за стареење и болести поврзани со возраста, што би можело значително да го подобри квалитетот на животот на постарите лица“, заклучуваат авторите на студијата објавена во списанието Cell.