Skip to content
Европската комисија денес ја презентираше новата стратегија за борба против дрогата и акциски план за спречување на трговијата со наркотици, која секоја година одзема околу 7.500 животи ширум Европа.
„Со денешната Стратегија на ЕУ за дроги и акцискиот план испраќаме јасна порака до наркобосовите и нивните организации: Европа возвраќа удар“, изјави еврокомесарот за внатрешни работи Магнус Брунер.
Иако борбата против дрогата главно е во надлежност на државите членки, Комисијата бара засилена соработка и подобра координација, особено меѓу царинските служби и компаниите за достава на пратки, со цел поефикасно откривање на наркотици во поштенски пратки.
„ЕУ нема да дозволи криминалните мрежи да ги преплават нашите улици со евтина дрога и да го поттикнуваат насилството“, додаде Брунер. Тој потсети дека 7.500 Европејци годишно го губат животот поради дрога, без да се вклучат бројните последици како корупција, криминал и општествена штета.
Во Хрватска, Министерството за здравство и Хрватскиот завод за јавно здравство ја спроведуваат Националната стратегија за делување во областа на зависности до 2030 година, со особен акцент на превенцијата за да се прекине циклусот на зависност, сиромаштија и организиран криминал.
Надлежните предупредуваат на растечкиот пазар на синтетички дроги и на влијанието на криминалните групи врз ранливите заедници.
Министерството за внатрешни работи најави формирање национален мулти-агенциски центар за борба против криумчарењето во реално време.
Поголеми овластувања за европските агенции
Европската комисија предлага проширување на мандатот на Агенцијата на ЕУ за дроги (EUDA), како и подобра соработка меѓу компаниите за достава и царинските служби. Агенцијата Фронтекс ќе биде опремена со сателити и дронови за поефикасен надзор.
Со новите овластувања, EUDA ќе има клучна улога во идентификацијата на нови психоактивни супстанции, издавање брзи предупредувања и процена на ризиците, особено од моќните синтетички опиоиди.
Стратегијата предвидува и подобрување на системite за собирање податоци, мониторинг, рано предупредување и брзи реакции на ризици поврзани со дрогата на национално и европско ниво. Во таа насока ќе се формира форум кој ќе ги обедини секторот за достава, царината и полициските агенции.
Контрола на прекурзори и меѓународна соработка
Предвидени се и мерки за подобра контрола на прекурзорите, легални хемикалии што се користат во хемиската и фармацевтската индустрија, но често се злоупотребуваат за производство на дрога.
Комисијата предупредува дека криминалните групи постојано ги менуваат маршрутите и методите на шверц, што бара динамична и координирана реакција.
Во последниот извештај на EUDA од јуни беше посочено дека моќни синтетички опиоиди се појавуваат сè почесто на европскиот пазар, претставувајќи сериозна закана. Канабисот и кокаинот остануваат најчесто користени дроги во ЕУ.
Новата стратегија испраќа сигнал дека Унијата се подготвува за многу поенергична борба против дрогата во годинава во која европските власти се соочуваат со незапаметен раст на синтетички супстанции и организирани криминални мрежи.
