Skip to content
Европската комисија ја ублажи планираната забрана за мотори со внатрешно согорување до 2035 година, што германските производители на автомобили го прославуваат како победа. Сепак, оваа промена може да им даде предност на кинеските конкуренти, кои ќе имаат повеќе време да ја зацврстат својата позиција на европските и светските пазари, пишува Politico.
Новата регулатива овозможува производство на plug-in хибриди, чисти мотори со внатрешно согорување и таканаречени „range extenders“ – мали мотори кои ја полнат батеријата и ја зголемуваат автономијата на возилата. Иако ЕУ тврди дека со тоа се балансираат климатските цели и глобалната конкурентност на европската автоиндустрија, критичарите предупредуваат дека одлуката ја забавува транзицијата кон целосно електрични возила.
„Ова може да ја оштети европската конкурентност и всушност да ѝ помогне на Кина побрзо да напредува“, вели Нилс Редекер од Центарот Жак Делор. Холандскиот европратеник Мохамед Чахим дури го нарече ова „божиќен подарок за кинеската автомобилска индустрија“.
Во Кина повеќе од 50% од продадените автомобили се електрични, а производителите таму масовно се насочија кон електрични возила. Додека европските производители сè уште инвестираат во хибриди и мотори со внатрешно согорување, кинеските брендови ја зацврстуваат својата доминација, особено на пазарите во развој како Латинска Америка и Југоисточна Азија.
Според анализите на Ember и други индустриски извори, трките за електрични возила се забрзуваат, а Европа ризикува да ги изгуби овие важни пазари доколку не ја забрза транзицијата кон целосно електрични автомобили.