Skip to content
Фудбалската федерација на Македонија (ФФМ) го потврди Гоце Седлоски за нов селектор на А-репрезентацијата, по одлука на највисокото тело на Федерацијата, донесена по предлог на комисија во која се и претседателот Масар Омерагиќ и директорот на репрезентациите Горан Пандев.
Претседателот на ФФМ, Омерагиќ, јавно му се заблагодари на досегашниот селектор Благоја Милевски и порача дека промената е направена со оценка дека на националниот тим му е потребна „нова енергија“ за да се брка целта – пласман на Светско првенство. Тој посочи дека и учеството во бараж е успех, но дека пресудиле и резултатите во квалификацискиот циклус, посебно исходот во Велс, по кој Федерацијата се одлучила за смена.
Седлоски, во првата изјава по назначувањето, нагласи дека ја презема функцијата како „најголема чест и најголема одговорност“ во кариерата и најави дека ќе гради систем и селекција што ќе се бори за секоја топка, без оглед на тоа дали Македонија ќе биде фаворит. „Од тимот ќе барам максимален ангажман, храброст и желба за секој меч… Сакам да видам тим кој ќе стои цврсто до последна минута и нема да се откажува“, порача Седлоски.
Според најавата, неговото деби на клупата треба да биде во март, на гостувањето кај Данска во Копенхаген, во баражот за пласман на СП 2026.