Црна Гора ги укина визите за турските граѓани, престојот скратен на 30 дена

Владата на Црна Гора соопшти дека ја укинува обврската за визи за граѓаните на Турција и повторно воведува безвизен режим, но со построги правила: дозволениот престој се скратува од 90 на 30 дена. Потегот се образложува како мерка за спречување нелегална миграција и како чекор кон усогласување со визната политика на Европската унија, во контекст на евроинтеграциските обврски на Подгорица.

Од црногорска страна се нагласува дека, паралелно со враќањето на безвизниот режим, се засилуваат безбедносните и миграциските проверки, а во комуникацијата се посочува и „унапредена соработка“ со турските власти. Во исто време, Владата остава отворена можност визите повторно да се воведат доколку надлежните проценат дека постојат безбедносни ризици.

Црна Гора ги воведе визите за турските државјани кон крајот на октомври, по инцидент во Подгорица што предизвика тензии и серија јавни реакции, по што темата доби и изразен миграциски и безбедносен контекст. Сегашната одлука, според дел од регионалните медиуми, е донесена како дел од поширок пакет мерки за визната политика, со најави и за дополнителни усогласувања кон средината на јануари.