Skip to content
Русија планира во следната деценија да изгради електрана на Месечината, која би ја напојувала руската лунарна програма и заедничката руско-кинеска „Меѓународна лунарна истражувачка станица“ (ILRS). Според соопштението на Роскосмос, проектот предвидува објектот да биде реализиран до 2036 година, како инфраструктурна основа за премин од поединечни мисии кон долгорочна, „постојано функционална“ научна станица.
Клучниот сигнал дека станува збор за високоризичен, технолошки сложен потфат е и договорот што Роскосмос го потпишал со „Лавочкин асоцијација“ за реализација на проектот до 2036 година, како и вклучувањето на Росатом и Институтот „Курчатов“ во изградбата. Иако Роскосмос формално не прецизира дека централата ќе биде нуклеарна, самите партнери и претходните јавни изјави на раководството дека целта е „нуклеарна централа на Месечината“ ја туркаат приказната во таа насока.
Планот доаѓа во момент кога и Пекинг јавно сигнализираше дека ILRS треба да има нуклеарен извор на енергија на лунарната површина како дополнување на соларните решенија, со таргет-рокови околу средината на 2030-тите. Со други зборови, Москва и Пекинг ја поставуваат енергијата како „прва цигла“ за трајно присуство на Месечината – предуслов за ровери, опсерватории, комуникациска инфраструктура и континуирана научна работа.
Објавата има и јасен политички подтекст: Русија се обидува да ја врати тежината во вселенската трка по серијата удари врз нејзините амбиции, меѓу кои и неуспешното слетување на „Луна-25“ во август 2023 година, додека конкуренцијата на САД и Кина се забрзува со сопствени лунарни програми и партнерства.