Skip to content
Инцидент на традиционална празнична манифестација во Лерин (Флорина) ја разгоре грчката јавност откако настапот на бендот „Banda Entopica“ беше прекинат среде концерт, поради изведба на песна на словенски (локален „ентопика“) говор. Според јавното соопштение на бендот, градоначалникот Василис Јаннакис интервенирал за време на нивната работа, со навреди и барања да престанат да пеат „такви песни“ во „неговиот град“, а паралелно дошло и до турканици на сцената и закани дека ќе биде повикана полиција.
Од „Banda Entopica“ велат дека на настапите пеат на повеќе балкански јазици и дека не изведуваат песни што промовираат омраза или национализам. Тврдат и дека од публика од околу 2.000 луѓе, негативно реагирале „само десетина“, додека мнозинството останало за музиката и атмосферата.
Неколку дена подоцна, самиот бенд излезе со дополнителни појаснувања поради, како што наведуваат, „континуирано ширење лажни тврдења“ за тоа што било испеано. Тие прецизираат дека во Лерин ги извеле „Софка“ и „Ела Керко“, а не „Eleno Kerko“, за кое дел од јавноста ги обвинуваше дека намерно го пееле. Во истото појаснување наведуваат дека имале одобрение да изведат „две–три“ локални „ентопика“ песни кон крајот на програмата, и дека и покрај интервенцијата на градоначалникот и мал број присутни, тие решиле да продолжат со концертот заради останатата публика.
Реакции стигнаа и од грчката музичка сцена. „Сојузот на музичари од Северна Грција“ со јавно соопштение го осуди прекинот, зборувајќи за недозволиво однесување кон музичари на работно место и повика општинските структури да се огласат и да побараат јавно извинување, нудејќи и институционална/правна поддршка за бендот. Дел од домашните портали оваа реакција ја пренесоа како став на „панхеленска“ музичка асоцијација.
Политичката димензија дополнително се засили откако СИРИЗА ја оцени интервенцијата како „цензура“ и како опасен сигнал за слободата на уметничко изразување, потсетувајќи дека бендот не настапувал по покана на градоначалникот, туку на организаторите.
Од друга страна, во дел од грчките медиуми се пренесува и одбрана на постапката на локалната власт: дека настанот не бил официјална општинска манифестација, дека организацијата била поврзана со локално здружение, како и дека темата е „исклучително чувствителна“ во регионот поради историски и геополитички контекст.