Skip to content
Новата 2026 година пристигна во Австралија со традиционалниот спектакл над сиднејското пристаниште, но годинава со поинаков тон: градот застана една минута во 23:00 часот по локално време, во знак на почит за жртвите од нападот во Бонди од средината на декември. Потоа, полноќната пиротехника ја осветли линијата од Операта до Харбор Бриџ, во првиот голем глобален телевизиски „дочек“ што секоја година го гледа светот.
Според организаторите, во „моментот на единство“ мостот светеше бело, а на пилоните беше проектирана менора, додека посетителите беа повикани да ги вклучат светлата на телефоните како симболична солидарност. Веднаш потоа, на небото се врати класичниот сиднејски потпис: илјадници ефекти, лансирани од мостот, Операта и понтоните во заливот, распослани низ повеќеколометарскиот појас на пристаништето.
Празничната ноќ помина и под засилени мерки за безбедност. Австралиските медиуми и агенции јавуваат за ангажман на повеќе од 2.500 до околу 3.000 полицајци, дел и со долги цевки, во обид да се намали ризикот по трагичниот настан во Бонди, во кој загинаа 15 лица. Властите испратија порака дека јавниот живот не смее да биде заложник на стравот, но истовремено го подигнаа нивото на видливо присуство на улиците и околу масовните собири.
Додека Сиднеј го завршуваше одбројувањето, Пацификот и Нов Зеланд веќе ја имаа пречекано 2026, со Окленд како прв голем град што ја означи полноќта со огномет од Скај Тауер. Празничната „линија“ потоа се спушта кон Источна Азија и Европа, каде што ноќта допрва ќе го земе својот дел од светлото.