Почина жената што тврдеше дека е „тајната ќерка“ на Фреди Меркјури

Жена која во јавноста беше позната само како „Б“ и која во книга објавена во 2025 година тврдеше дека е биолошка ќерка на Фреди Меркјури, починала на 48-годишна возраст. Веста ја пренесоа повеќе медиуми на 15 јануари 2026 година, повикувајќи се на изјава од нејзиниот сопруг.

Според тие извештаи, „Б“ со години се лекувала од тешка болест, а нејзиниот идентитет останал скриен и по смртта. Во дел од објавите се наведува и име „Биби“, но нема јавни, независно потврдени документи што би ја затвориле дилемата околу нејзиното потекло.

Приказната за наводната „тајна ќерка“ стана глобална тема во мај 2025 година, кога биографката Лесли-Ен Џонс ја најави/објави книгата „Love, Freddie“. Таму се тврди дека детето било зачнато во 1976 година, по кратка врска со сопругата на близок пријател, и дека Меркјури одржувал контакт со неа до смртта во 1991 година. Книгата се повикува на лични дневници и наводни приватни докази, кои не се ставени на јавна проверка.

Токму тука започна и спорот: дел од луѓето од најтесниот круг на Меркјури јавно изразија сомнеж дека тој би можел да сокрие ваква вест од најблиските. Во изјави што ги пренесоа британски медиуми во 2025 година, неговата долгогодишна блиска пријателка Мери Остин рече дека никогаш не знаела за дете, ниту за дневници, и дека би ѝ било „неверојатно“ такво нешто да остане тајна за неа.

Затоа, и по веста за смртта на „Б“, прашањето што реално останува отворено е истото што ја следеше приказната од почеток: дали станува збор за автентичен, досега непознат дел од биографијата на фронтменот на Queen – или за наратив што се потпира на приватни тврдења, без јавна и независна потврда.